Covid Art Project – Benjamin Romero impression E virus misterioso

“Un virus misterioso cu ta afecta mente y sintimento di hende a keda descubri na Nogaly. Ya caba e virus masha contagioso aki a cobra bida di un hende. E pashent a muri victima di agresividad, cudishi, individualismo, rabia y odio cu a pone su curason faya cu e resultado fatal ey. E victima di e virus a sufri un shock repentino y fulminante …”

E noticia aki a haci cu finalmente Eddy a lanta fo’i soño. El a sinti su curpa un tiki cayente y cu calafriu. E tabata full soda y su flanel papa muha. El a pensa cu tur cos a cuminsa manera un mal soño. Si, un mal soño cu bo kier sali for di dje, pero bo no por. E ta mara bo y e ta mustra mas duro cu bo. Ta e sorto di soño pisa cu ta haci bo su prizonero. Te hasta bo no sa si ta un soño e ta of si ta realidad e ta…

E soño cu su tata a lag’e tur suak y tristo. El a sinti un bashi den su curason. Un biaha mas e remordemento cu e tabatin pa añas no tabata lag’e trankil. Berdaderamente el a bira un prizonero di su propio soño cu su tata.

“Mi por a haci algo p’e. Dicon mi no a hacie?” Un biaha mas e tabata tortura su mes cu e mesun reflexion, remordemento, sintimento di culpa y pregunta sin contesta. Mas cu cuater decada pasa Eddy su tata a fayece tragicamente, pero te ainda su recuerdo tabata fresco den su mente. Un peso masha pisa cu el a carga riba su mes consenshi manera un turtuga ta soporta e peso pisa di su propio curpa.

E television tabata cendi. Ainda e koffie preto cu Maria a laga riba su mesita di anochi tabata perfuma su camber. Eddy semper a pensa cu koffie tabata stimula cerebro. E tabata un balsamo pa trankilisa su nervio y su temor.

Ainda e por a sinti e smaak dushi di e lipstick cu su casa a stempel riba su lipnan un rato pasa, ora cu ainda e tabata drumi … prizonero di su mal soño. Pa añanan Maria tabatin e custumber di laga testimonio di su presencia pa medio di un koffie fresco y un sunchi prome cu e sali bay trabou. Maria a laga e television cendi net na e canal di noticia internacional cu a referi na e virus. Eddy a ripara cu e noticia di e virus misterioso na Nogaly no tabata parti di su mal soño.

Ainda cu un tiki flohera el a pensa pa su mes cu apenas un aña nobo a caba di habri y ya caba e medionan di comunicacion internacional tabata cuminsa divulga noticia negativo y tendencioso pa spanta hende cu tur sorto di pronostico. Pa Eddy Prensa a cay den un decadencia total caminda good news is no news. Noticia positivo no ta bende, sino sensacion y dolor so pa trafica cu sintimento di hende.

Un rato despues Eddy su celular a dal un ping mustrando cu un mensahe a drenta via WhatsApp. E biaha aki Ricky a manda algo: “Bon dia, bro! Bo a tende e noticia di un virus straño na Nogaly? Dios ta rabia cu nos. Mescos cu Señor tabata rabia cu e habitantenan di Ninive den Yonas 1-2”.

Eddy a dicidi di no contesta e mensahe di su amigo di biaha, pa no drenta den e mesun discusion teologico den cual regularmente nan tabata debati tocante Dios su amor y su castigo pa ser humano. Pa Eddy e versiculo di Bijbel cu su amigo Ricky a referi na dje, caminda un bayena a guli Yonas, tabata un hiperbole fantastico hopi bon concebi literariamente. Aunke un dia Ricky a yega di bis’e energicamente: “Esey no ta un hiperbole, ta un berdad! Ta asina cu Yonas a permanece tres dia den e bestia su bariga, pa finalmente wordo transporta contra su boluntad te na e ciudad di Ninive pa salba su pueblo”.

Eddy a sinti un sensacion straño. Den su experiencia di bida di mas cu mita siglo, el a convence su mes cu casualidad no ta existi. Ainda riba e sero chikito y desordena di buki cu tabatin riba su mesita di anochi e novela di e escritor Fredy González Zubiría cu el a yega di lesa no mucho tempo atras tabata pronk. Den e buki ta conta e storia cu a sosode na mita di siglo 18 cu e barco Sirius.

E barco aki, cu a sali for di e isla di Corsou rumbo pa Riohacha, a confronta problema riba lama bruto, ora cu tur su tripulantenan a resulta contagia cu colera. Eddy, kende tabata un enciclopedia humano bibo, a corda cu e prome pandemia di e bacteria aki a sosode na 1817.

Nan tabata benta cada morto abordo di Sirius den lama. Ora cu e barco a yega tera firme, e unico cu tabata mas morto cu bibo tabata su capitan, e Hulandes Jacob van Duyn. Unabes cu el a tira e anker, e capitan a hala su ultimo rosea. Pa evita un epidemia local e autoridadnan di e localidad a dicidi di cende e barco na candela y lag’e drif riba lama. Asina e leyenda di un barco fantasma cu ta nabega den Lama Caribe a nace.

E pueblo unda e barco Sirius a yega a keda funda ora cu un conkistado Aleman cu tabata muriendo di sed a topa cu un Indjan Guajiro, kende a hib’e canto di un riu transparente y friu manera un diamanta. Como gesto di gradicimento, Nicolas de Federman a dun’e un hacha. Eynan, den harmonia cu otro, nan a dicidi di lanta un pueblo cu a hiba e nomber historico di e trocamento ey, Riohacha.

Eddy a corda cu, historicamente, presencia di virus den humanidad a yega di inspira un di su autornan faborito. Pest Bubonico of Pest Preto a bira un pandemia cu a inspira e novelista y periodista Frances Albert Camus pa skirbi su obra E Pest. Pest Bubonico a bira un burdugu pa ser humano. Durante siglo XIV un di tres parti di e poblacion di Europa a muri victima di dje.

E Pest a laga un impresion fuerte cerca Eddy tempo cu e tabata un hobencito universitario. E autor a stempel un sentencia den su profesion cu e no por a lubida nunca: E pio epidemia no ta biologico, sino moral.

Eventualmente, den un situacion similar bo lo por mira bondad y maldad di ser humano. Falta di solidaridad, egoismo, inmadurez y iracionalidad. Pero tambe bo por mira e parti antonimo di nan. Hende di bon curason cu ta dispuesto te hasta pa sacrifica nan propio bida y bida di nan famia pa bienestar y cuido di otro.

Eddy su curpa a coy ril. E noticia relaciona cu e virus straño na Nogaly a pon’e pensa no solamente riba Pest Bubonico, sino tambe riba otro virus cu a yega di asota humanidad mortalmente. Virus cu a marca historia di humanidad alrededor di cada pasa un siglo, manera Colera y Griep Spaño, e ultimo aki conoci na Papiamento como Kabouter.

“Griep Spaño tabata e ultimo pandemia cu humanidad a conoce”, el a bisa den su mes. Eddy a haya un gran curiosidad. El a bay Google pa busca mas informacion relaciona cu Griep Spaño. Locual Griep Spaño a haci tabata devastador. Den dos aña el a produci alrededor di 100 miyon morto.

Durante e ultimo siglo y cu cambio di milenio mundo a conoce un gran desaroyo cientifico pa medio di biotecnologia. E pensamento aki a trece trankilidad cerca dje. Di biaha Eddy a sinti mas curiosidad sinta dilanti di su computer y el a cuminsa mira cantidad di potret di e tempo aya online.

Eddy su atencion a concentra riba aspecto di e hendenan cu a keda inmortalisa danki na magia di fotografia, cu e tempo aya a cuminsa bira popular. El a cuminsa wak cantidad di potret di antaño di henter un generacion cu a yega di existi na principio di siglo pasa.

Potret di hende anonimo di tur edad cu nan a saca pa cualke ocasion special: cumpleaño, casamento, aniversario … Nan tabatin un beyesa natural, simplemente bunita. Hoben cu mirada perdi ta wak sin mira un futuro desconoci. Cara sin expresion, sin sonrisa, lora den un nubia cu efecto di luz y sombra manera den un obra di Rembrandt.

Ciudadano cu a sufri nan propio preocupacion durante e pandemia di Griep Spaño. Algun di nan a muri na edad relativamente jong, victima di un enemigo silencioso y invisibel. “Un enemigo mortal cu a laga miyones di morto den henter mundo den apenas dos aña”, el a pensa.

El a cay den un reflexion existencialista riba e hendenan cu a forma parti di un generacion den historia di humanidad. Generacion di hende cu a proyecta existencia di ser humano cada dia: un ta bini, un otro ta bay, manera ola di lama. Di esnan cu a bay mas cu un siglo pasa, e shinishi di nan existencia so nan a laga atras. Por ta ni sikiera esey. Tampoco nan recuerdonan… Ainda algun hende por corda nan. Of gewoon nan a bay den olvido pa semper.

Un dia a pasa y e anochi ey e rayonan di luna tabata ilumina Eddy su camber y su reflexion. Eddy, cu mirada perdi, a pensa riba tur e potretnan cu el a contempla e mainta ey, y el a bisa pa su mes: “Talbes e mesun cos cu a pasa cu nan, lo pasa cu nos…” Mientras cu Moonlight Sonata di Beethoven tabata contribui cu e ambiente solitario y melancolico aki.

E mainta ey, prome mandatario di e pais a adverti caba: “No ta cuestion cu nos no tin caso ainda. Pero, nos mester prepara nos mes miho posibel. Pasobra, no ta un cuestion mas si e ta bin nos pais, Inritovirus lo bini nos pais.”

Eddy a cay na cuenta cu a transcuri dos luna caba cu a reporta e prome casonan na Nogaly. E no tabata un virus straño mas. El a haya un nomber caba: Inritovirus. Nan a batis’e cu e nomber ey, deriva di e palabra na Latin Inrito, cu ta nifica irita of rabia.

Masha poco e cientificonan tabata conoce di e fenomeno epidemiologico inespera aki. Organisacion Mundial di Virus (World Virus Organization)a informa inicialmente cu e fuente di e virus tabata un cacho di caya cu a morde un habitante den un mercado popular di Nogaly. Pero, e hipotesis aki poco poco a bira menos creibel.

Na inicio nan a informa cu e persona a cuminsa haya complicacion. Autoridad di salud a kere gewoon cu tabata sintoma di rabia transmiti pa e cacho di caya. Pero, ora cu e pashent a cuminsa manifesta sintoma no controlabel di cudishi, individualismo, rabia y odio, e cientificonan di Nogaly a considera e caso aki uno digno di investigacion profundo. Ademas, e persona en cuestion tabata un empleado di nan propio laboratorio nacional di investigacion di virus.

A base di informacion suministra door di fuente anonimo cu tabatin vinculo cu organismo di inteligencia cu ta opera den henter mundo, mas version a cuminsa sali afo. Un prestigioso corant a bin cu un investigacion periodistico cu tabata indica cu ta na un instituto di Nogaly cu tabata haci experimento relaciona cu un virus di antisintimento, e contagio a inicia. E virus a leak y el a cuminsa plama pa descuido, debi cu e laboratorio su infrastructura tabata deficiente, violando tur regla di biosiguridad.

Ta asina cu e instituto menciona, pa falta di recurso financiero, tabata presenta algun fayo den su protocol di siguridad pa realisa su investigacion riba tereno di Inritovirus. E hecho cu a informa cu tur e cientificonan cu tabata trahando den e investigacion ey a muri, entre nan e prome victima reporta internacionalmente, sin cu niun hende por a haya mas informacion di nan, a lanta mas sospecho.

A neglisha e noticia aki completamente, debi na influencia di poder scur infiltra den e medionan di comunicacion internacional. Ta asina cu e version oficial cu a keda vigente tocante origen di Inritovirus tabata esun di e pashent mordi pa un cacho di caya den un mercado popular yen di bestia exotico na Nogaly.

Sinembargo, a surgi un grupo mas radical asocia cu Wikileaks. Nan tabata masha skeptico tocante e berdadero origen di e virus. Cantidad di hipotesis a cuminsa circula tocante e pakico di e virus aki.

Humanidad no tabata pensa dos biaha pa busca culpabel y baha nan rabia y tur nan frustracion riba nan. A cuestiona y critica e region di Nogaly, cu no tabata mucho conoci riba mapa mundial, cu e argumento cu nan a sconde informacion. Otro argumento contra nan tabata nan falta di transparencia riba tereno di investigacion cientifico.

Den e medionan di comunicacion a presenta y divulga tur sorto di hipotesis tocante origen di e virus. Teoria di conspiracion sin base informativo tabata referi na e hecho cu servicio di inteligencia a revela cu un cientifico, docente di un universidad prestigioso, tabatin conexion cu un laboratorio di investigacion di Nogaly.

Supuestamente, gobierno di Nogaly a paga e persona ey pa realisa un atake biologico pa afecta tanto economia como poblacion di e potencianan mundial. A considera e virus como un arma biologico di Nogaly pa logra cierto obhetivo strategico di liderazgo mundial.

Tur sorto di noticia falso y sin base -conoci den e lenguahe periodistico como fake news- a cuminsa bira viral. Nan tabata pidi pa bo comparti cu otro hende, locual a yuda plama e mal informacion aki mas rapidamente cu Inritovirus mes.

Nan tabata specula cu creacion di e virus aki tabata pa sirbi e deseo ambicioso di Nogaly di tin mas presencia y mas poder economico den mundo.

Pa otro hende Inritovirus tabata parti di un programa diseña pa baha gasto halto riba presupuesto di polis pa mantene orden publico. Igualmente a circula e version cu Nogaly a dicidi di plama e virus di un forma planea pa reduci e poblacion cu ta genera tur sorto di violencia: bringamento, conflicto personal y familiar, violencia domestico, abuso di menor etc. … ocasionando tur sorto di gasto den nan presupuesto nacional.

E gastonan riba tereno social y husticia tur aña tabat subi, sin cu e paisnan mas poderoso por a controla nan. Mientras cu e presion constante di e instancianan internacional di supervision financiero a bira un piedra insoportabel den nan sapato.

Nan tabata hipotesis cu a cuminsa circula den e medionan social tocante Inritovirus su origen y e motibo su tras, causando tur sorto di speculacion y ambiente di temor.

Algun di esnan cu a fomenta tur sorto di teoria speculativo rond di origen di e virus tabata sufri di e Dunning-Kruger effect. Tur momento nan tabata expresa nan opinion den e medionan social como influencer. Te hasta nan tabata organisa foro, unda nan tabata trece dilanti, entre otro, cu Inritovirus a forma parti di un plan pa reduci e poblacion mundial.

Esaki tabata e caso di Eddy su colega Donny, kende cada dia tabata mustra mas rigido durante nan combersacion cu nan otro coleganan di universidad. Donny a uni su mes na e club di persona ultracrepidario. Tur ora e tabata opina via e medionan social y e medionan di comunicacion tocante e teorianan conspirativo respecto e virus, sin base ni argumento di peso.

E forma cu Donny tabata expresa su mes tabata mustr’e como un experto riba e materia y un persona bon documenta cientificamente. Eddy a cuminsa sinti un sensacion straño cerca dje. Donny no tabata limita su mes na trece dilanti su opinion, sino cu te hasta e tabata purba impone su idea riba otro hende, mustrando comosifuera t’e tabatin e berdad absoluto. Anto e otronan tabata hende kens y incompetente.

Cada bes cu Eddy tabata confront’e cu un pregunta, e tabata ripara cu Donny no tabata sa mucho di e virus, pero e tabata expresa su mes manera un cientifico. Un dia Donny a skirbi: “Ban ta serio, shonnan! Inritovirus no ta nada otro cu un producto publicitario pa complace e capitalistanan cu tin inversion grandi den e laboratorionan multinacional di produccion di medicamento y nan ta doño di cadena di botica.”

Eddy a desahoga su mes mandando un whatsapp pa su amigo y confidente.

-“Casper a mira e comentario cu mi colega Donny a haci den e medionan social? Ta un berguensa!”

-“Eddy, esaki ta un motibo pakico m’a sali for di Facebook. Pa mi nan ta un club di hende cu kier sa bida di otro hende, y nan ta fingi di ta experto den tur cos. Ta un club di hende caweta y sabi, sin sa nada di nada! Pero si nan ta pendiente pa sa kico bo ta bisa, pa nan bin cu nan comentarionan fo’i sla.”

-“Casper”, Eddy a reacciona cu bos calmo, “abo semper cu un actitud extremista.”

-“Si, Eddy, un perdemento di tempo valioso e ta”, Casper a contest’e.