Diabierne, dia 21 di januari 2022, e concierto digital “Get Up, Stand Up Keep Up a tuma luga.
Un iniciativa di Jeremy Bonarriba, Sunny Ray Entertainment, Live Music Aruba colaboración cu Chaos Café, Hardgrooves Jazz Café, Alfies y Rock’n’Rock y teams dinamico di banda y MC’s.
Proyecto ‘Get Up – Stand Up – Keep Up’ ta sostene escena di musica alternativo ariba Aruba.
E presentacion ta inclui conciertonan di e bandanan Honeypot, Oruba, Liam Sean Kelly & the Late Romances, y Bandi’Lama y tambe interviews cu e diferente banda y café’s. E proyecto y concierto digital aki a conta cu sosten financiero di e ‘Kickstart Regeling’ di Prins Bernard Cultuurfonds Caribisch Gebied.
Por mira e concierto ariba e pagina facebook di Live Music Aruba y su YouTube channel y tambe tur colaborador di e proyecto. Telearuba lo transmiti e concierto aki tambe ariba un otro fecha cu lo wordo anuncia ainda.
COVID-19 tabata tin un impacto grandi ariba economia di Aruba.
E sector di musicanan y tambe small business a wordo afecta grandemente y ainda ta hopi vulnerabel. Pesey, durante pandemia, e drummer local Jeremy Bonarriba, Sunny Ray Entertainment y Live Music Aruba a uni forsa cu Sketch Advertising y 4 Café’s nan cu pa añanan largo a support live music y e musiconan cu ta perform na e establecimentonan aki. E cafenan aki ta Chaos Café, Alfie’s in Aruba, Rock’n’Rock y Hard Grooves Jazz Café.
Cada venue por a scoge un banda cu nan tabata kier duna sosten den e proyecto aki Inicialmente tabata e intencion pa haci 4 concierto live na e mesun momento, pero pa motibonan organisatorio y pa motibo di COVID-19, esaki no tabata posibel. Pesey, durante e ultimo simannan a scohe pa a graba 4 concierto separa, un na cada venue y haci un produccion final cu tur 4 concierto hunto pa presenta esaki online.
Cada concierto ta wordo presenta cu un MC. E team dinámico di MC’s aki ta consiti di Lee Croes, Bryan Dirkz, Marlienne Lyder y Francis Tromp, cual ta sa di trese un show varia cu lo mustra e diversidad di e escena musical alternativo cu nos isla ta biba tur fin di siman. Tin un grupo grandi di hende na Aruba cu ta goza di musica en bibo cu no ta necesariamente bailabel, pero cu ta trece canticanan original y inovativo.
E bandanan cu ta trece esaki tambe a sufri door di e efecto di e pandemia mescos cu henter mundo, pero sigur a keda busca nan moda pa “Get up, Stand Up y Keep Up”.
E proyecto aki ta duna nan un extra sosten.
