“… e gran balor di Riedel su obra ta ku e ta kondusí su lektornan na un kiebro ku e mito, esta ku Brion a lucha solamente na fabor di liberashon di Venezuela”.
A.F. Paula
Den e obra original fasinante akí ta sera konosí pa promé biaha ku e personalidat berdadero di Luis Brion. Un Yu di Kòrsou, un idealista outéntiko ku a lucha pa Kòrsou i despues pa su gran ideal: liberashon di Amérika, sin lubidá su isla natal. Nos por lesa di logronan, pero tambe di intriga i desepshon ku Pedro Luis Brion a transformá den un lucha ideológiko sin probecho personal. E obra akí ta kibra ku mitonan tokante nos héroe di nivel internashonal i ta duna kontesta riba preguntanan fundamental ku te ainda no a haña kontesta.
For di 1966 te ku aña 2004 señor Riedel a traha komo maestro di skol i den diferente otro funshon den enseñansa. Durante su karera e tabata ko-outor i redaktor di shete buki pa enseñansa, entre otro tokante nos historia.
Un otro kara di Luis Brion, skibí riba enkargo di Fondo Kultural Prins Bernhard pa Antia Hulandes i Aruba, ta su promé publikashon individual.
