Durante presentashon di e programa Bista riba Papiamentu na radio, nos a haña mashá hopi reakshon di hende ku ker a haña teksto di e programa riba papel. Pa kumpli ku e deseo ei nos a disidí di publiká un buki ku e teksto i ademas un cd ku grabashon di e programanan. Pa por a realisá e proyekto akí, nos a haña sosten financiero di Prins Bernhard Cultuurfonds Nederlandse Antillen en Aruba i Giro Bank N.V. Nos ke gradisí tur persona i instansia ku di un òf otro forma a kontribuí na realisashon di e programa. Un danki special ta bai na radio-emisora Z-86, ku a pone ora disponibel tantu pa graba komo pa pasa e programa. David Ariza, empleado di Z-86, na un manera mashá kreativo i dediká a graba tur nos programanan durante vários siman. Nos ta spera ku e buki akí lo ta di balor pa públiko general i ku lo e haña un lugá apropiá den enseñansa avansá.
Enrique Muller
Cathleen Giterson
Reginald Römer
