Nieuws  | Conferensia di Idioma Caribense na Aruba

PBCCG ta orguyo di por a sostené e di 20 Konferensia di Sosiedat di Idioma Caribense na Aruba na na prinsipio di ougùstùs 2014

Un bista evaluativo riba e di 20 Conferencia Bienal di Society for Caribbean Linguistics teni na Aruba

Recientemente a tuma luga na Holiday Inn Resort aki na Aruba e di 20 Conferencia Bienal di Society for Caribbean Linguistics (SCL), organisa hunto cu Society for Pidgin and Creole Linguistics (SPCL) y Associação de Crioulos de Base Lexical Portuguesa e Espanhola (ACBLPE). E tema di e conferencia tabata “The Caribbean Today: Language Awareness and Language Development – Caribe Awe: Consenshi Linguistico y Desaroyo di Lenga”. Un evaluacion ta na su luga y esey e tres organisacionnan ey y e Comision Organisado Local (COL) di Aruba ta haciendo. Importante pa nos di COL ta: Kico nos a siña na fabor di conscientisacion y desaroyo linguistico na Aruba?
Mas o menos 180 linguista di rond mundo a participa na e conferencia aki cu a ofrece un cantidad di shen (100) charla durante 4 dia. E charlanan aki, tur di calidad halto y resultado di investigacion cientifico, tabata parti den 17 sesion cu a cubri diferente tema.
Na e apertura oficial tanto Su Excelencia Gobernador Fredis Refunjol como Su Excelencia Michelle Hooijboer-Winklaar, Ministro di Enseñansa, Maneho di Famia y Educacion pa Adulto, a enfoca riba e papel di Papiamento den comunidad di Aruba y riba e retonan existente relaciona cu dos parti importante di maneho y planificacion di idioma, esta planificacion di status y planificacion di corpus. COL ta contento cu Sra. Hooijboer-Winklaar a menciona Proyecto Scol Multilingual (PSML), cu tin un luga prominente pa Papiamento.
Den e conferencia mes Papiamento a haya hopi atencion. Tabatin e charlanan principal di Ramon Todd Dandaré Mag. Ling. (Aruba) “Papiamento y Identidad”, di Dr. Marta Dijkhoff (Corsou) “Language planning and political restructuring in Curaçao: what’s new?” y di Dr. Ronald Severing (Corsou) “Logro di papiamentu den milenio nobo”. Tur tres charla a enfoca riba diferente aspecto di maneho y planificacion di idioma na nos islanan ABC.
Departamento di Enseñansa tabata representa pa drs. Régine Croes, kende a tene su charla “Reaching beyond the Scol Multilingual Project: Overhauling the whole education system toward a meaningful multilingual learner-centered education” tocante e metanan,e retonan y e futuro di Scol Multilingual. Instituto Pedagogico Arubano (IPA) tabata representa pa drs. Merlynne Williams cu su charla tocante un aspecto linguistico di Papiamento: “Marking the marker: Habitual aspect “sa” in Papiamento/u”. Drs. Frank Zaandam a representa Caribbean University of Aruba cu su charla “The teaching of a linguistic approach to children of the primary school as part of language development”. Jenny Fraai a duna un relato extenso na Papiamento di e trabou di alfabetisacion di Fundashon Pro Alfa di Corsou.
Ta remarcabel cu di stranheria tambe tabatin diferente charla cu Papiamento como topico, esta di Silvia Kouwenberg di Jamaica, Helene Garrett y Eugene Igras di Canada, Marco Schaumloeffel di Brasil, Keisha Wiel di Merca y Ana Sulai Capponi di Italia. Den diferente otro charla tabata haci mencion di Papiamento na un manera sumamente positivo. Den e otro tres charlanan principal, esta di Dr. Manuel Veiga di Cabo Verde, di Prof. Hubert Devonish di Jamaica y di Prof. Mervyn Alleyne di Jamaica, a pone enfasis riba e forsa di Papiamento den e comunidadnan di Aruba, Boneiro y Corsou.
Ta bon pa enfatisa cu cada un di e shen charlanan aki tabata di hopi balor pa tur esnan presente, kendenan kier keda al tanto di e desaroyonan riba tereno di, entre otro, crioyistica, linguistica aplica, linguistica di contacto, linguistica historico, fonetica, fonologia, morfosintaxis, lexicografia, idioma y educacion, y idioma y identidad.
E conferencia aki ta keda marca como uno historico, como cu pa prome biaha den un conferencia di SCL, SPCL y/of ACBLPE tabatin charla principal den un idioma crioyo: tabatin e charla principal na Caboverdiano di Dr. Manuel Veiga “Prusésu di Afirmason y Valorizason di Kriolu di Kabu Verdi” y dos charla principal na Papiamento, esta di Dr. Ronald Severing di Corsou y di Ramon Todd Dandaré Mag. Ling. di Aruba, menciona mas ariba. E conferencistanan a aprecia esaki enormente. E Comision Organisado Local a percura pa un presentacion di powerpoint na Ingles pa yuda esnan cu no ta domina Caboverdiano ni Papiamento compronde loke e oradornan a trece dilanti.
A clausura e conferencia cu un panel di e tres presidentenan Hubert Devonish (SCL), Rocky Meade (SPCL) y Clancy Clements (ACBLPE), den cua nan a discuti, entre otro, tocante e formanan mas efectivo pa comparti informacion y resultado di investigacion. Nan a formula e siguiente consehonan: 1. colabora riba tereno di publicacion; 2. crea banco di dato y haci nan digitalmente disponibel pa investigacion y enseñansa; 3. probecha mas di internet pa distribui tur sorto di informacion tocante lenga, cultura y comunidad crioyo. E proposicionnan aki ta duna nos di Aruba tambe e posibilidad pa participa mas activamente riba podium internacional.
Ta obvio cu un conferencia manera esaki ta hopi importante pa crea un red di contacto internacional, tanto personal, como pa e institutonan. COL a spera di por a ricibi na e conferencia aki mas profesional Arubiano activo den enseñansa y den idioma. Lamentablemente e participacion aki tabata minimo, parcialmernte causa pa e echo cu e departamentonan y institutonan concerni no a subsidia e suma di registracion pa nan empleadonan, como aporte na nan profesionalisacion. P’esey COL ta contento cu den consulta cu SCL a dicidi di tene entrada pa e charlanan principal, cualnan tabata den oranan di atardi, gratis pa publico di Aruba. Resultado ta cu e sesionnan gratis aki si tabata basta bon atendi pa hende di Aruba.
Na 2015 lo tin un conferencia di ACBLPE hunto cu SPCL na Austria. E siguiente conferencia di SCL ta na 2016 na Jamaica y esun di ACBLPE lo ta na Cabo Verde, tambe na 2016.
COL y e organisacionnan SCL, SPCL y ACBLPE ta gradici tur esnan cu a contribui na un of otro forma na e exito di e conferencia aki: e boluntarionan cu a traha incansablemente, hopi di nan hasta dos aña largo, pa prepara e conferencia; tur esnan cu a traha den e Sala di Papiamento, dunando informacion y bendiendo buki; e camarografonan y e fotografo cu a percura pa cada parti di e conferencia a keda inmortalisa; e artistanan cu a haci e fiesta di bonbini y e fiesta di despedida inolvidabel; e artesanonan cu a exhibi nan productonan cu e seyo di Aruba.
Un gradicimento special ta bay pa e instancianan cu a haci e conferencia aki posibel cu nan sosten financiero y material. Na prome luga COL, SCL, SPCL y ACBLPE tin cu gradici UNOCA y Prins Bernhard Cultuurfonds Caribisch Gebied como e dos financiadonan principal, cu no a duda di e importancia y e factibilidad di e conferencia aki y a aproba e presupuesto inmediatamente. Mester gradici tambe diferente otro sponsor cu a contribui cu e detayenan cu tabata asina importante pa exito di e conferencia; e sponsornan aki ta Setar N.V., Office Systems Aruba, Manchebo Beach Resort & Spa, High Performance, Delta Blue Electronics N.V, Tropical Bottling Company, Nilda & Elsa & Company, Aruba Tourism Authority, SAGICOR, Palmera Quality Products, SAM Wine & Liqueur Maker y Holiday Inn Beach Resort. Danki, danki y mas danki!